السلام عليكم ورحمة الله وبركاته ،،

ياحيا الله من جانا ( ياحيا الله من يانا لاخواننا الخليجيين ) ... منورينا ..

ملاحظة :
منتدانا منتدى لاهل السنه والجماعه يعني مانبي مواضيع تتنافى مع اهل السنه اللي بيجيب مواضيع سب بالسنه او التشكيك فيهم نصكه على دمجته ونمغطة بوووووووووز من قوته يتخثر اللي ببطنه..

اتمنى محد يزعل اننا حاطين قوانين وهالشي بيحفظ حقوقكم كلكم ومافي شي بهالدينا يمشي بدون قانون ونظام صدقوني اذا اختفى النظام يصير لخبطة.. لذلك اتمنى محد يزعل ..وصدقوني انظمتنا مافيها تعقيد مجرد انك تعرف وش الي لك ووش اللي عليك وتطبقه وابد ماتلقى الا خوانـ(ن) لك ..

1. هدفنا من يوم فتحنا هالموقع اننا نجمع ناس صاحية ومانجمع ناس معاقه فكريا ً وعندهم عجز عن الانتاج الفكري يعني مايعرف يكتب سطرين على بعضهم بموضوع وماعنده الا المنقول والله يسلم ( آية الله قوقل ) وعشان كذا المنقول مرفوض عندنا ببعض الاقسام لذلك شف القسم اللي مانبي فيه النقل.

2. عندك اقسام بمنتداكم يعني شف وش اللي يصلح له حطه فيه .. يعني مو تجيني تجدع لي تصميم بقسم شعر .. وحنا مااقصرنا شرحنا تحت اسم كل قسم وعبرنا عن محتواه ..

3. مسموح الذب بين الاعضاء واللي يشوف انه يزعل من الذب بكيفه بس ينبه الادارة عشان نعطية رتبة ( نعومي لاحد يقرب له ) وحنا ترى اخوان .. وفرقوا بين الذب وبين السب .. السب كلام وصخ .. وهذا مانبيه ..

4. مسألة انك تكتب موضوع بالعربي الفصيح بكيفك لكن لاتلزم غيرك بالرد بنفس الطريقة لا... صحيح انها لغتنا الام بس عاد كلن بكيفه هنا يرد بالعامي ولا بالفصيح .. لا حد يجيني يتفلسف ويقول لكل مقامـ(ن) مقال ترى شبعنا ..

5. ممنوع التسجيل باسماء قبائل سواء بالعربي او بالانقليزي .. يعني زي ( العنزي - العتيبي - القحطاني ... الخ ) كلنا نفخر بهالقبايل وغيرها من قبائل عربية والتاريخ يشهد ببطولاتهم لكن هنا مانبي نفتح مجال للمناحره والمشاحنه قبيلتنا احسن من قبيلتكم وقال الشيخ فلان وقال الشيخ علان .. على عيني وراسي بس تدلون منتدياتهم ..لاحظوا اننا جالسين نسد اي ثغرة تسبب المشاكل بيننا وحنا نبي الدعوة اخويه .. واللي بيسجل تراه بنغير يوزره على طول قبل نفعل له ..

6. اللي بيسجل بيوزر مشابة ليوزر شخص ثاني قديم سواء بالانقليزي او بالعربي تراه بيتغير يوزره .. واللي يشوف شخص مسجل بنفس يوزرة يبلغ الادارة ..

7. القلقسه ( الغزل ) اللي بيقلقس عند بنات خلق الله وهذا ايميلي وهذا رقمي بنمحط به ياخي احترم الموجودين اول شي وبعدين الي يجوزون لبعض يتفاهمون برى المنتدى وعساهم يديتون بعض بس مو بعندنا هنا وتاكدوا ان هالشي يغضب ربكم قبل كلش واللي بنكفشة بخلوة غير شرعية باي موضوع بنصور رده ونحطه بموضوع بقسم ساحة الصفاة ونمحطة برتبة ( مودينه للحلاق ).. :d ونخلي الاعضاء يعلقون بس بدون قلة ادب وان تكرر هالشي مرة ثانية الله معك ونظل محترمين الى اخر لحظه ..

8. ابعدوا عن سب الدين والسياسة وسب الحكايم ولا يجيب لنا احد احاديث مغلوطه وضعيفة لازم تذكر المصدر وتفاصيل الحديث كامله وترفق رابط الموقع اللي انت جايب منه الحديث وشرط ( يكون موقع سنه وجماعه موثوق ) وترى اللي بيخالف بيوقف على طول دون سابق انذار ..

9. اغاني مانبي ( يندرج تحتها التصاميم )- صور بنات وفنانات مانبي ( يندرج تحتها التصاميم )- مقاطع بلوتوث ضحك بس يعني مو تجيب لي صور رقص وزفن وترزها لنا ههه .. يعني مثل مايقول المثل ( انما الامم الاخلاق ) << ماني حافظ الباقي .. :dبرضوا توقيعك يدل على هويتك مو تجي تحط اغنية وصور سلق .. ماحنا ناقصين ذنوبكم ..

10. اخبار فنانين وحمار اكادمي وسوبر حمار مانبي رجاء ً ..

11. اي شخص يشوف اي شي مخالف يراسل الادارة ولا يتردد مايجي يسب العضو حتى لو كان العضو غلطان عليه يعني لاتناقشه وراسلنا ولا بنقلب عليك قبله ... وراح يشوف وش بنسوي بالغلطان ماحنا بناقصين مشاكل .. ومو تمشي اذا احد غلط عليك من دون لاتبلغنا تراك تهمنا وتاكد ان حقك بتاخذه من الادارة قبل العضو ..

12. مواضيع ( حللوني - انا ماشي - انا بترك المنتدى ) مانبيها مو معناه انك تبي تتترك المنتدى تقلب المنتدى مناحه وترانا فاتحين 24 ساعه .. لاطاح اللي براسك تعال واذا كنت مشرف عندك قسم خاص بالمشرفين تعطيهم خبر هناك .. وبالنهاية لاتتهاون باي حرف تكتبه بالنت تراه مثل الواقع يعني راقب الله في اي تصرف والدنيا فانيه وانا اخوكم ..

13. ممنوع وضع الصور الخاصة والتميلح شوفوني وفكوا معي .. اما بتوقيع او رد او موضوع او اياً كان .. ممنوع وراح تحرره الادارة وتعطيك تنبية ..

وبالنهاية لاتتهاون باي حرف تكتبه بالنت تراه مثل الواقع يعني راقب الله في اي تصرف والدنيا فانيه وانا اخوكم ..